Dia 15 i dia 16 di mart 2024, Dolphin Suites Curaçao a selebrá 15 aña di eksistensia i tambe apertura di un edifisio nobo na e hotel, hasiendo un gesto sumamente bunita na De SGR-groep.

Pa selebrá e gran logro aki, Dolphin Suites a organisá un seminario sumamente interesante i inspirativo dia 15 di mart 2024 tokante "Mindset & Resilience", na benefisio di nos organisashon. Tres oradó internashonal, Niek van Adel, Peter Kapitein i Kirti Daryanani, a kompartí nan eksperensia i konosementu tokante resilensia i mindset ku tur esnan presente.

Durante di e apertura di e edifisio nobo dia 16 di mart 2024, Dolphin Suites a hasi entrega di e donashon na De SGR-Groep. E seminario a rekoudá un suma total di Nafl. 20.676 danki na entre otro benta di entrada, un inisiativa di 'crowdfunding' di e oradó Niek van Adel i tambe un rifa. Nos deseo ta pa krea un 'Music Hall' ku e donashon aki, kaminda nos klientenan por traha riba nan desaroyo pa medio di músika.

Nos di De SGR-groep ta sumamente agradesido na Dolphin Suites Curacao i tur persona ku di un òf otro forma a yuda realisá e proyekto aki. Mashá mashá danki pa e gesto bunita aki na nos organisashon, ku ta yuda duna nos klientenan su bida koló!

Galeria di portrèt