Donashon & Boluntario
Fundashon Verriet ta duna kuido i guia na personanan ku un limitashon intelektual, físiko òf múltiple. Nos ta hasi esaki ku e meta pa yuda duna nifikashon na e bida di e personanan ku limitashon i pa fortifiká nan abilidatnan. E kuido ku nos ta ofresé ta finansiá for di e fondo di Lei di Labizjan. For di esaki ta sòru pa kalidat di kuido i tur e nesesidatnan básiko di e klientenan manera kuminda, alohamentu i kuido diario serka nos personal. Apesar di esaki, nos ta kere ku e klientenan meresé tambe di disfrutá di e kosnan dushi di bida. P’esei atraves di Vrienden van Verriet nos ta hasi petishonnan pa donashon, pa asina nos por brinda e klientenan algu èkstra i duna nan bida koló.
Kontribuí ku bo granito!
Bo por tin un impakto dirèkt den bida di nos klientenan dunando nos fundashon un man. Hasi bo donashon awor òf bira boluntario!
Donashon
Amigunan di Verriet (Vrienden van Verriet) ta duna sosten na Fundashon Verriet i tin komo meta sentral pa hasi bida di personanan ku un desabilidat físiko i/òf mental mas bunita i kolorido. Amigunan di Verriet ta organisá aktividatnan pa rekoudá fondo i tambe nan ta buska donashon di instansianan di forma pro-aktivo.
Si bo ke duna un kontribushon finansiero, por pasa esaki riba nos kuenta di banko òf pasa personal na nos ofisina prinsipal.
- Stichting Vrienden van Fundashon Verriet
- Adrès: Prinsenlaan 5
- Banko: Maduro & Curiel’s Bank
- Number di kuenta: 26738501
Pa mas informashon por manda un imeil na info@sgrgroep.org.
Trabou Boluntario
E personal di Fundashon Verriet regularmente ta haña sosten di boluntarionan ku ta empeñá sin interes propio na kuido i kalidat di bida di e klientenan. Nan embolbimento sosial ta di balor invaluabel pa e kliente i pa nos organisashon. Bo tambe por duna bo kontribushon na Fundashon Verriet i hasi un impakto direkto den bida di nos klientenan, dedikando tempu na nan òf inskribí pa sierto aktividat.
Lo bo ke inskribí komo boluntario? Manda un imeil pa rachel_domacasse@sgrgroep.org ku bo petishon pa bira boluntario i un deklarashon di bon kundukta (VOG). Den kaso ku tin pregunta por tuma kontakto ku señora Rachel Domacasse via e imeil adrès aki riba òf via di number di telefòn 737-7600 ekst 2225.
Promé ku por kuminsá komo boluntario, lo hiba un kombersashon orientativo pa huntu wak unda e persona ku ke ta boluntario su interes ta sinta. A base di e deseo- i nesesidatnan den e organisashon, lo plania un dia di orientashon den un departamentu di e organisashon, pa asina haña un idea kon e trabou di boluntario ta serka nos.
