Fasilidatnan di bibienda
Fundashon Verriet ta ofresé diferente fasilidat di bibienda pa personanan ku desabilidat físiko i/òf mental i tambe na personanan ku tin outismo. Fundashon Verriet tin diferente tipo di grupo di enfoke. E gruponan di enfoke ta varia di hopi dependiente di kuido i guia te na un grado bastante haltu di independensia, pero ku ketu bai tin nesesidat di guia.
En total Fundashon Verriet tin 51 kas na 8 diferente lokalidat riba nos isla, ku ta alohá alrededor di 300 kliente. Kada lokalidat/bibienda ta destiná pa un grupo di enfoke spesífiko.
Den un bibienda tin gruponan di seis te ocho kliente ta biba huntu. Mayoria kliente tin nan propio kamber, pero algun ta kompartí un kamber ku un kompañero. Kada bibienda tin un sala sentral kaminda ta kome i rekreá huntu. Tin un grupo fiho di lider ta traha riba kada kas pa guia e klientenan. E guia ku nan ta ofresé ta kuadra ku e nesesidat- i kapasidatnan di e habitantenan.
Nos lokalidatnan di bibienda:
- Kaya Prinses Juliana, Emmastad
- Salsbachweg, Santa Maria
- Huize Jos Wouter, Muizenberg
- Kas Ed Leonora, Muizenberg
- Kas Kayena Nobo, Muizenberg
- Kas Richard Pieternella, Kirindongo Abou
- Kas Kirindongo Abo, Kirindongo Abou
- Kas Nort Sapaté Fase 1, Nort Sapaté
- Kas Nort Sapaté Fase 2, Nort Sapaté
Kas di terapia pa personanan ku un limitashon mental leve
Fundashon Verriet tin fasilidat di tratamentu pa hóbennan ku tin limitashon mental leve i ku problema di komportashon moderá te severo tambe. E fasilidat na Emmastad ta konsistí di dos kas, kada un pa seis persona. E hóbennan ta haña guia den fase, kaminda tratamentu i despues e reintegrashon bèk na nan propio kas ta di suma importansia. E guia i tratamentu ta dirigí riba reforsá nan kompetensianan sosial i tratamentu di trouma- i problemanan sígiko. Despues di e periodo di tratamentu nan por bai bèk kas òf nan mester bai un otro forma di biba adaptá. E durashon di tempu pa pasa dor di tur e fasenan, ta tuma mas o ménos dos pa tres aña.
