Revalidá
Revalidashon por tuma lugá tantu den un ‘setting’ poliklíniko komo klíniko. E médiko di revalidashon ta determiná huntu ku e kliente kua ‘setting’ ta mas adekuá, dependé di su situashon. E dòkter ta saminá, trata i konsehá, ku e meta pa kapasitá e persona enbolbí pa e alkansá i mantené sierto grado di independensia.
Karakterístika di e kuido di revalidashon ku nos ta brinda, ta e karakter multidisiplinario di e kuido, kaminda profeshonalnan di diferente disiplina ta traha huntu i pone e kliente sentral. Di e forma aki Het Revalidatiecentrum Curaçao ta traha huntu ku e kliente na su rekuperashon. E médiko di revalidashon ta diagnostiká i ta traha un plan inisial di tratamentu pa e kliente. Riba e base akí ta dirigí/referí e kliente na e diferente disiplinanan di revalidashon.
Revalidashon Klíniko
Revalidashon klíniko ta nifiká revalidashon kaminda un persona ta keda interná pa un periodo den nos sentro, riba e departamentu di kuido médiko. Promé ku e hospitalisashon, e kliente ta sera konosí ku e dòkter di revalidashon. Mayoria biaha esaki ta tuma lugá for di den hospital. Riba e dia di hospitalisashon den nos sentro, e kliente lo tin un kombersashon ku e dòkter di revalidashon ku lo hasi un eksaminashon físiko, pa asina e por traha un plan di tratamentu ku e terapianan ku e kliente tin mester.
Nos klínika tin 12 kamber ku 21 kama. Tur kamber tin un baño ku ta sumamente aksesibel ku ròlstul. Mayoria di e kambernan tin dos kama. Algun kamber di un persona so, tin funshonnan spesífiko manera entre otro un espasio pa isolashon di kontakto, un kamber espasioso den kua por hasi uso di un brankar ku por bai den baño i left di hisa pa tratamentunan mas kompliká. Tambe tin un studio ku un kushina chikí. Tin tambe bastante posibilidat pa sosiegu pa nos klientenan i tambe un biblioteka kaminda por lesa buki, revista i/òf hasi uso di un kompüter.
Revalidashon Poliklíniko
Kontrali na revalidashon klíniko, no mester keda interná den nos sentro, den kaso di revalidashon poliklíniko. E dòkter di revalidashon ta desaroyá un programa di tratamentu personal pa e kliente, ku e terapianan ku e tin mester, manera por ehèmpel fisioterapia den kombinashon ku èrgo-terapia. Un seshon di terapia ta dura mas o ménos mei ora. Si e kliente mester sigui diferente terapia, lo plania esakinan tras di otro. Dependiendo di e programa di e kliente, e lo mester bini un òf mas dia na Het Revalidatiecentrum Curaçao. E terapeutanan ku ta wak e progreso pa siman i ta ahustá e programa kaminda esaki ta nesesario.
