Terapia pa Outismo
Fundashon Verriet ta ofresé diferente forma di tratamentu i guia na personanan ku outismo, pa stimulá nan desaroyo i yuda nan haña un lugá adekuá den komunidat. Un tim multidisiplinario ta ofresé yudansa amplio na e kliente ku outismo.
E tim di terapia pa outismo di Fundashon Verriet ta buska un forma adekuá pa duna yudansa na e kliente. Despues ku a mèldu i a hasi kombersashon di atmishon, e kliente por haña un lugá na un di e diferente formanan di tratamentu pa outismo di Fundashon Verriet. Nos formanan di guia i tratamentu ta:
Sentro Ortopedagógiko Mia Bremmers
Grupo Luna i Grupo Strea di nos Sentro Ortopedagógiko Mia Bremmers, ta ofresé un programa dirigí riba desaroyo di e mucha ku outismo entre 3 pa 7 aña. E programa ta partikularmente dirigí riba abilidatnan sosial, regulashon di komportashon i desaroyo kognitivo. Meta ta pa yega na un kontinuashon na skol básiko (spesial). E struktura di dia ta parse esun di skol preparatorio i ta dirigí riba siñamentu di abilidatnan pa skol i sosial ku ta nesesario den un grupo. Banda di e momentonan di trabou, ta duna tambe terapia di kabai, logopedia den grupo, treinen di wega i deporte.
Het Savaanhuis
Na Het Savaanhuis tin un grupo di mèrdia/atardi. Esaki ta un grupo di tratamentu pa muchanan ku outismo den e edat di 7 te ku 12 aña, ku mester di guia èkstra riba tereno di abilidatnan general di bida diario, abilidatnan sosial, kon pa yena tempu liber, i regulashon di emoshon. E muchanan akí ta bai skol básiko òf skol spesial i ta bin tres biaha pa siman despues di skol na Het Savaanhuis.
Pa kada mucha ta traha un plan di tratamentu dirigí riba su nesesidatnan individual. Si ta nesesario e muchanan ta haña guia individual, dirigí riba e nesesidatnan spesífiko di desaroyo di e mucha. E guia akí por konsistí di treinen di wega òf terapia di kombersashon individual. Banda di esaki ta ofresé tambe aktividatnan músikal, deporte i terapia ku kabai.
Terapia ku Kabai
Banda di e terapianan ku a menshoná aki riba, ta duna terapia ku kabai tambe (Equine assisted therapy) na nos Rancho Harmonia. Terapia ku kabai ta ofresé posibilidatnan amplio pa guia mucha- i hóbennan ku outismo i stimulá nan den nan desaroyo. E posibilidatnan pa stimulashon i interakshon entre e kliente, e terapeuta i e kabai, ta hasi e animal un partner ideal di terapia. E kabai ta neutral i no ta duna krítika, pues den tempu korto por krea un laso di konfiansa entre e kabai i e kliente. E siguiente aktividatnan por tuma lugá durante e terapia ku kabai: kore kabai, baña e kabai, ehersisio riba kabai i aktividatnan edukashonal. Por ofresé e terapia tantu individual komo den grupo.
Primi aki pa mas informashon tokante Rancho Harmonia.
