Revalidashon di mucha
Grupo terapéutiko di mucha
E grupo terapéutiko di mucha ta un forma intensivo di revalidashon i guia pa mucha. E grupo terapéutiko pa mucha ta pa muchanan entre 1 pa 4 aña di edat, ku pa motibu di nan desabilidat físiko no por bai un krèsh konvenshonal. E muchanan ta haña tratamentu serka un tim multidisiplinario, kaminda e mayor- i kuidadónan tambe ta forma parti di dje. Alokashon di un mucha den e grupo aki por sosodé despues di evaluashon di e dòkter di revalidashon na Het Revalidatiecentrum i despues di un deliberashon ku e diferente profeshonalnan multidisiplinario.
Skol Mytyl/Tytyl
Het Revalidatiecentrum Curaçao tin un kolaborashon estrecho ku Soeur Hedwig school. Soeur Hedwig school ta un skol Mtyl/Tytyl ku ta duna enseñansa spesial na alumnonan entre 4 i 21 aña. Ta usa e nòmber Mytyl/Tytyl generalmente pa alumnonan ku un desabilidat físiko òf multiple. Algun alumno di e skol akí ta haña tratamentu na nos sentro di revalidashon. Durante evaluashon e dòkter di revalidashon ta evaluá e tratamentu korespondiente, ku mayornan i tambe ku e dosente di e alumno. Hopi biaha e dosente tin un ròl den e proseso di kuido médiko dor di señalá problemanan físiko na skol.
