Terapianan
Na Het Revalidatiecentrum Curaçao, por hasi diferente terapia durante e proseso di revalidashon, entre otro fysioterapia/terapia di moveshon, ergoterapia i logopedia.
Fisioterapia/Terapia di moveshon
Si tin problema ku movementu, ta referí e kliente na un fisioterapista. Fisioterapia tin komo meta ku e kliente por hasi e moveshonnan ku ta nesesario den su bida diario. E fisioterapista sa kon nos ta hasi moveshonnan ku nos kurpa. E ta determiná kon e kliente lo por bai hasi sierto moveshonnan atrobe òf siña hasi nan na un otro manera.
E tratamentu di fisioterapia ta konsistí partikularmente di terapia di moveshon, tambe yamá terapia di ehersisio. E ehersisio por ta dirigí pa:
- Bo siña kana òf move mihó;
- Hasi bo forsa di múskulo mas fuerte;
- Mehorá bo postura;
- Mehorá bo kondishon;
- Siña bo anda ku rekursonan;
- Siña bo relahá mihó.
E tratamentu tambe por ta un kombinashon di ehersisio, masashi i tratamentu ku aparatonan elektróniko. Podisé lo tin mester di rekursonan manera ròlstul, aparato ortopédiko, kòrsèt, plantia, spalk pa pia òf un prótesis. Durante e tratamentunan serka e fisioterapista e kliente ta siña kon ta e mihó manera pa anda ku e rekurso relevante p’e. Tambe e fisioterapista ta duna konseho tokante rekursonan pa kana.
Ergoterapia
Ergoterapia ta yuda personanan ku un desabilidat funshoná mas independiente posibel den nan aktividatnan di tur dia. E ergoterapista ta hasi ehersisio ku e kliente ku no solamente ta yuda pa hasi aktividatnan di tur dia, pero tambe aktividatnan na trabou, trabou di kas, hòbi òf transportashon.
E ehersisio por ta pa hasi aktividatnan manera baña, kita i bisti paña, kome, postura di sinta, kon trata ku un ròlstul i partisipá den tráfiko. E ergoterapista lo duna konseho tambe tokante adaptashonnan deseá pa por ehèmpel vestuario, kubierto i bibienda di e kliente. Kaminda ta nesesario lo e yuda tambe pa bestèl spalk pa man i otro rekursonan di sosten pa kurpa.
Logopedista
Si un kliente tin problema pa papia òf pa komprondé kiko otro hende ta bisa, lo referí e kliente na un logopedista. Papia ta un manera pa komuniká ku otro hende. Den kaso ku esaki no ta logra, por ehèmpel a konsekuensia di un leshon selebral, e logopedista lo yuda e kliente pa haña otro manera pa komuniká. Tambe ta posibel pa enkorporá e famia di e kliente den e ehersisio akí. Famia por siña e ora ei kiko nan mester hasi òf keda sin hasi pa un kombersashon por kana mas mihó posibel.
Si e kliente tin problema pa komprondé otronan, e logopedista lo hasi ehersisio di tende i skucha pa asina e kliente siña rekonosé zonido i palabra. E logopedista por yuda tambe si tin problema ku kou òf guli. Esaki ta sosodé pa medio di ehersisio kaminda ta trein e múskulonan, tin be hasiendo uso di diferente rekursonan.
